旅遊日誌 | 銀仔流浪記 | 橫渡非洲之旅 DAY 2 恐懼(莫三比克NAMPULA)

由於太多時間，看看餐廳價錢合理，起初都唔捨得食，諗諗吓係香港都要食架。以前窮遊唔捨得食係因為香港同其他國家物價差得太遠，現在係香港貴過全世界，只要合理價錢一定食。我唔會學網上或報章所講嘅”過份窮遊”，外遊時靠摷垃圾桶、食人地食剩嘅食物，但回到自己國家時就回復大洗嘅習慣。所以我依家外遊都唔會點瘦了，以前去親都梗瘦十磅八磅架!

於是係餐廳揀個景觀開揚嘅靚位，點左個big breakfast $69-R, ＋ filter coffee$15-R(共$49-HKD)。問職員才知道，機場有free wifi，要先用E貓登記，就有30min。由於好多地方都都防範你會用上不同Email，即等於無限上網。所以佢會認住你ip，即要用不同嘅機才可用完再用嘅free wifi。於是我用完電話用ipad，用不同email就可以有一小時free wifi用啦，呵呵~

兩個多小時機程於1330到達Nampula機場，過關時警察話我無一張莫桑比克領事館嘅紙，向我索取$100美元，當然企硬唔比啦，最後佢都好無奈咁蓋印放行。我諗我有莫桑比克簽證都咁留難我，餘下行程用特區或BNO，就算不用簽證，在各個國家過境時一定有排煩！

∇ 降落Nampula前用部長炮zoom埋去，質素唔錯喎! 高空所見，Namupla有好多光禿禿嘅岩山，好得意~

∇ 機場大堂
∇ 的士內倒後鏡掛有莫桑比克國旗

∇ 係車內可以放膽影

到達hostel，hostel及的士司機都只收當地錢。司機就話$6-USD只等於$150-MZM，我都睇過匯率無理由咁少，又想呃我… 但司機好好人咁車我去銀行，可惜全部關門，只能於ATM提款，就用Citi試吓睇吓係咪免手續費先！（後記：回港後檢視戶口，確認海外提款無收手續費，唔錯唔錯。）

Ruby backpacker係LP極度推介，果然唔錯噃～ 有獨立房，床位及露營三個選擇，我一支公當然選擇了Dom啦，每晚$750-MZM($110-HKD)，但Wifi只能於1800至0600提供有限度服務。

∇ 共用廚房
∇ 住宿管家

Ruby Backpacker位於宣明會旁，諗住影相又比保安屈錢，當然無理佢走人返回住宿。逃回Ruby Backpacker覺得有少少氣餒，回想由到埗到依家，最恐懼嘅係由落機開始到依家，不論機場及街道上連一個遊客都見唔到。黃種人無，白人也完全見唔到，行出街好異相，感覺D當地黑人成日望住你一樣，好不安，有點像放了一隻小白羊入動物園嘅老虎竇咁呀⋯ 加上入境職員想屈錢、係街上連影張相都唔得，真係旅途上前所未有嘅挫敗感⋯ 要深呼吸冷靜一下，思考一下未來動向。